பைந்தமிழ்த்தேர்ப் பாகன் பாரதி (அறுசீர்க்கழிநெடிலடி ஆசிரிய விருத்தம்)

விடுதலை உணர்வைத் தீப்போல

      விளைத்தவன் யார்?அவன் பாரதியே

கெடுதல் இல்லாச் சமுதாயம்

      கிளைத்திடச் செய்ததும் அவன்தானே?

அடுக்களைப் பெண்களை ஆண்களொடு

      அவனியில் வலம்வரச் செய்ததனால்

உடுக்களை நிகர்த்திடும் கவிஞருளே

      உதிக்கும் ஞாயிறு அவனாவான்

காமராசருக்கு நிகர் யார்? (இருவிகற்ப நேரிசை வெண்பா)

கல்வியெனும் கண்திறந்த காமராசர் மாணவர்க்கு

நல்லுணவும் சீருடையும் நல்கவைத்தார் - நல்லிதயம்

கொண்டஇவர் போலிங்கு யார்வருவார்? கோமகனைக்

கொண்டிடுவோம் நம்மனத்தி லே.

இயற்கை (எண்சீர்க் கழிநெடிலடி ஆசிரிய விருத்தம்)

களைத்துவரும் மனிதர்க்கு நிழலைத் தந்து

      களிப்படையச் செய்வதுநல் இயற்கை ஆகும்

முளைத்திடுநல் செடிகொடிநல் இயற்கை ஆகும்

      முயல்மான்கள் முதலான விலங்குக் கூட்டம்

திளைத்திடுநல் லின்பத்தில் உள்ளம் சொக்கத்

       தீங்குரலில் பாடுகிற பறவைக் கூட்டம்

சளைத்தலின்றி அழகுமிகு காட்சி தம்மைச்

      சமைக்கின்ற இயற்கைக்கு நிகரே யில்லை

நல்லாசிரியர் (நேரிசை ஆசிரியப்பா)

ஒழுக்கம் இரக்கம் இறைமை கொள்கை

விழுப்பம் மிக்க கலைகளில் தேர்ச்சி

தொகுத்துக் கூறும் வன்மை மேன்மை

பகுத்துக் காணும் உலகியல் அறிவு

சான்றோர் போற்றும் சால்பாம் குணங்கள்

வான்றோய் மலைபோல் வளமோ டுயர்வு

நிலமதை யொத்த திண்மை பொறுமை

நலமிகு நிறைகோல் போன்ற நடுநிலை

மணத்தோடு மலரும் மலர்போல் மாட்சி

குணத்குயர் வோரே நல்லா சிரியர்

நன்னூல் நவிலுமிந் நலமோடு

பன்னெடுங் காலம் பார்மிசை வாழ்கவே!

சீரழிக்கும் தொலைக்காட்சி (கலிவிருத்தங்கள்)

1. நெறியற்ற நிறுவனங்கள் பேசும் பொய்கள்

    அறிவுக்கு வேலைதராப் பரிசுத் திட்டம்

    வெறியூட்டிப் பண்பாட்டைக் கெடுக்கும் பாட்டு

    தறிகெட்ட வாழ்வுக்கா தொலைவின் காட்சி?

2. கட்டிய உடையினைக் களையும் காட்சியால்

    ஒட்டிய உதடுகள் உரசும் காட்சியால்

    கட்டினில் புரண்டிடும் காமக் காட்சியால்

    கெட்டிடும் இளமனம் போதும் கீழ்மையே

3. பிறமொழிச் சொற்களைப் பிணைத்த ஓசையை

    நறவது நிகர்தமிழ் பாடல் என்பது

    நெறியது நெறிசெலத் தூண்டும் கள்ளினை

    அறிவிலி உயிர்தரு அமுதம் என்பதாம்

நலம்சேர்க்கும்வழி (இருவிகற்ப நேரிசை வெண்பா)

தாய்பபாலுக் கொப்பான தாய்மொழியில் கற்பதுதான்

சேய்போலும் மாணவர்க்குச் சீரியது – நோய்போலத்

தாக்கிநலம் போக்குகிற ஆங்கிலத்துக் கல்விதனை

நீக்கிநலம் சேர்க்கும்வழி தேர்

வன்முறையை நீக்கலாம் வா (இருவிகற்ப நேரிசை வெண்பா)

அன்புவழி நின்றே அமைதியினைக் காத்திடுதல்

இன்பவழி என்றுணர்ந்து இவ்வுலகில் - துன்பமுறும்

நன்முறையை நாடுதலே நன்றாகும்@ நன்னெஞ்சே

வன்முறையை நீக்கலாம் வா